2025年1月5日贈醫贈藥

2025年1月5日贈醫贈藥

余專員、林議員、各位嘉賓、各位市民 老友記，早晨！

今日我地九龍中醫師公會喺 呢度，慶祝中華人民共和國成立75周年，舉辦香港首屆中醫中藥文化節轄下嘅贈醫贈藥獻愛心活動。

呢次活動好高興得到油尖旺民政事務署嘅支持同協助，尤其係有余專員今日親臨做主禮嘉賓。我也知道林議員，稍後要出發外訪。兩位係百忙之中抽時間來支持我地今日嘅活動，實屬難得，衷心感謝余專員和林議員。

依家我簡單介紹下我哋九龍中醫師公會，我哋個會係1946年由一班香港中醫界翹楚所創立，至今已扎根喺油尖旺區乃至香港78年歷史。

公會嘅前輩們 喺會務運作逐漸走上正軌之時，懷著中醫師懸壺濟世嘅精神，也都期望將中醫藥發揚光大，於是於1962年 策劃創立九龍中醫師學院，設置係我哋位於新填地街嘅會址，志在栽培新秀，發揚國醫國術。學院由李燮卿前輩擔任首屆院長，從此奠定咗學院根基。

1977年我哋又係油麻地彌敦道開設學院分校，推行六年制教學。

係香港大學、中文大學、浸會大學未有中醫學院之前，我地九龍中醫師學院，係中醫界算係非常出色嘅中醫學府，歷來培訓出好多優秀中醫師，為香港中醫傳承同發展做出了極大貢獻。

講返贈醫贈藥，喺1978年，當時中藥材非常昂貴，有貧困嘅市民因為藥費昂貴，而拖延治療，我會嘅前輩有見及此，就開始籌辦贈醫贈藥善舉。

當時，承蒙得到70年代千萬司儀美譽嘅胡章釗先生同埋 潘游昭先生兩位善長嘅鼎力贊助，籌募到經費。公會理監事前賢也都熱心公益，紛紛樂助捐輸、出錢出力，實現我會濟世為懷，造福社群之理念，為當時的窮苦病者免費施治。

後來我地喺新填地街159號二樓，一直都有定期舉辦贈醫施藥活動，直至19年疫情爆發 才無奈停辦。贈醫贈藥活動也可以俾我地學院學生有一個臨床實習機會，其中也包含師傅帶徒弟嘅實質意義，我相信因此對香港中醫藥傳承也都起左舉足輕重嘅作用。

近幾年來，政府非常重視中醫藥發展，喺多方面給予我地中醫藥界大力支持，令到我地業界喺認受性同地位等方面，得到前所未有嘅提升。今次我地為了響應國家大力推廣中醫藥文化傳承，以及響應首屆香港中醫藥文化節，而舉辦贈醫贈藥獻愛心活動，希望能夠加深市民大眾對中醫藥認識和興趣，並提昇市民嘅健康素養及理念，促進香港中醫藥文化發展。

本會今後亦會繼續舉辦更多有利於促進中醫藥發展嘅活動，除咗健康講座、學術交流、贈醫施藥等等，仲會有機會到中小學做中醫藥知識宣傳，讓青少年一代直接認識中醫中藥。到時舉辦此類活動時，希望還能夠再次得到各位嘉賓、首長、醫師的支持，一齊為香港中醫藥發展而努力。

各位市民、各位老友記，今日我地在場十幾位中醫師，全部都係臨床經驗豐富嘅醫師，希望幫到大家。

最後，我要特別感謝今次活動嘅贊助者、以及所有中醫師和義工團隊的無私奉獻，有你們的支持今次嘅活動先能夠順利舉行。多謝你哋！

喺度祝大家新年快樂、身體健康。多謝大家。

                   2025-1-5